Tambagi Ko Noy Tikyo: Nagkasiloay

DEAR Noy Tikyo,

Ako si Garyboy, 25-anyos, usa ko ka call center agent dinhi sa Davao City.

Ang akong suliran mao ang akong lovelife. Naa koy kapuyo karon, 21-anyos. Kauban ko siya kaniadto sa call center apan mihawa human mi nagkahigugmaay ug nakahukom nga mag-ipon na lang kay wala pa man koy kuwartang igasto aron nga magpakasal.

Didto mi puyo sa balay sa akong ginikanan. Wala nay nahimo ang akong ginikanan gawas sa pag-uyon kay mabdos na man sab ang akong kapuyo.

Ang nakaapan kay kining akong kapuyo ug ang akong inahan mora og nagkasiloay. Unsa man pod ning akong kapuyo nga sobra man intawon ka manggiulawon. Di halos mogawas sa among kuwarto aron nga makigkulokabildo nila Papa ug Mama. Mogawas ra siya og mangaon. Pero og wala gani, sige lang og mukmok sa kuwarto.

Usa ka higayon misulti ang akong kapuyo nako nga migawas siya sa kuwarto aron nga mangasilyas. Iyang nasugatan sa sala ang akong mama, isog kuno kaayo og dagway niya ug way tingog-tingog.

Mao ni akong problema kay si Mama magsige og ingon nako nga disiplinahon nako ang akong kapuyo kay di daw maayo ang iyang batasan. Unsa may buhaton nako? Palihug tambagi ko.

Garyboy

***

Garyboy,

“Misunderstanding” lang ang nahitabo ning imong inahan ug imong kapuyo. Wala pa man god sila hingpit nga magkailhanay, ilabi na gyud sa ilang mga batasan. Kay gawas nga talagsa ra silang magkaistoryahay, talagsa ra sab silang magkasandurotay.

Angay nimong tambagan ang imong kapuyo nga di na siyang maglain ning imong ginikanan kay mora na god ni og iyang ginikanan usab. Kinahanglan nga magpakita siya og maayong pamatasan ngadto kanila, kay gawas nga naa mo estar sa imong ginikanan, magtiayon na sab mo. Angayan niyang irespeto sila kay mao na man gyud nang iyang kinabuhi karon.

Dako ka og papel aron nga mahilot kining ilang wala pagsinabtanay karon kay lisud na og modako kini ug di na hinuon mahatagan og sulbad. Busa mintras nga duna pay panahon, ikaw ang magpatunga nilang duha.

Ingna ang imong kapuyo nga maghatag siya og panahon nga magka-istorya sila sa imong ginikanan aron nga mahapsay na kining ilang wala pagsinabtanay.

Kon di siya makahimo niini, mas maayo nga maglain na lang mo og puyo kay lain kaayong paminawon nga usa ra mo ka balay, apan walay maayong pagtinagdanay.

Noy Tikyo