Super Love Story: Nabuta sa gugma

ORDINARYO ug simple lamang nga babae si Joy. Nanarbaho kini sa Valencia City, Bukidnon.

Apan nausab og maayo iyang kinabuhi dihang naila si Mel, usa ka security guard sa kompanya sa dapit.

Taliwala taas-taas ang agwat sa ilang edad apan wala kini nakapausab sa iyang pagbati ug ilang pagsinabtanay.

Gipabati ni Mel kaniya kon unsa siya ka importante nga babae sa kinabuhi niini ug gibaslan sab niya og walay sukod nga gugma.

Tungod kay nagsinabtanay man silang duha, nagkasabot nga mag-ipon lang usa samtang gatigom.

Hangtod nga nahatagan sila og duha ka mga anak nga bunga sa ilang panaghinigugmaay.

Walo ka tuig ang nilabay sa ilang panag-ipon dunay nadiskubre si Joy.

"Ang papa sa akong mga baby, wala nagsulti sa tinuod. Iyang sulti nako kay bulag na siya. After 8 years sa among relasyon na found out nako naa diay siya duha ka asawa ug mabutang nga ako ang ikatulo. Kung wala pa nako nakita ang post sa iyang anak nga lalaki dili nako siya mabisto." Nasakitan nga saysay ni Joy.

Daw maorag mahugno iyang kalibutan sa nadiskubre hinungdan aron gayud masiguro sekretong iyang gikita ang anak sa iyang kaipon sa dakbayan sa Cagayan de Oro.

"Nakig kita ko sa iyang anak nga naa sa Cagayan de Oro just to make sure dili joke ang ako nahibal-an. Tinuod gayud diay nga pamilyado siya ug mabutang nga kabit ra ko niya." Dugang saysay niini.

Tungod sab niini, iyang gikompronta si Mel taliwala niadtong tungora gisabak pa niya ilang ikaduha nga anak.

Wala nay mas sakit pa sa iyang gibati dihang nadungog mismo sa baba ni Mel ug pag-angkon sa tinuod. Gasige hangyo si Mel nga dili siya biyaan ug siya ang tinuod nga gihigugma niini taliwala aduna kini gibyaan nga lima ka mga anak sa duha niini ka mga asawa.

Apan mas gipili ni Joy nga magmalinawon sa pagpuyo kuyog iyang mga anak. Iya kining gibulagan tungod kay alang kaniya kini maoy nakaayo kaniya ug sa iyang mga anak.

Aminado kini nga dili sayon ug lisod kaayo ang iyang kahimtang nga siya lamang nanginabuhi ug gibilin iyang mga anak sa iyang ginikanan apan alang kaniya buhaton ang tanan.

Wala na usab plano si Joy balikan ang sakit nga kasinatian sa gugma ug pokos karong panahona sa iyang panarbaho ug pagpadako sa iyang mga anak.

Gibutyag niini nga unta magsilbing leksyon ang iyang storya sa gugma ngadto sa kadaghanan.

"Dili man nia ideal nga lovestory pero nanghinaot ko nga magsilbing leksyon sa tanan ang akong naagian. Sa dili pa ta mosulod deretso sa relasyon kinahanglan gyod sa nato ila-ilahon og maayo kon kinsa atong karelasyon ug dili ta magpakabuta bungol tungod lang sa gugma." Matud ni Joy. (SVB)