Tita Heart: Walay oras

DEAR Tita Heart,

Tawga lang ko sa pangalan nga Karen. Taga Alubijid. Akong problema tita bahin sa akong uyab nga dili ko niya gahatagan og time. Kay sa bag-o palang naging kami, nag-promise siya nako nga deserving siya mauyab ko ug ingon pod ko nga sabton nako siya kay nag-work man siya tas ako ga school. Pero tita, wala ko kaagwanta ako siya gibulagan kay 1 week naman gud siya walay text-text nako. Unsa akong buhaton tita? Nga sakit jud para nako among pagbulag maskin ako ang nagdesisyon nga dili na nako kaya. Palihog og tambagi ko.

Karen

*****

Hello Karen,

Pagtan-aw ko kanimo mubo ra kaayo imong pasensya labina diha sa inyong relasyon. Basin og busy lang gayud kaayo imong uyab nga bisan og pagtext dili mahimo. Naa man gud mga trabahoan nga sobra nga gidili ang pagtext-text. Basin pod naa siyay time motext wala pod load kay wala sa iyang budget. Pero imposible sab nga dili makaload diba? Bisan og good night o good morning walay text?

Gipaabot sab unta nimo og usa man lang ka bulan nga maobserbahan ang iyang tinuod nga kinaiya, aron mas maila nimo siya ug dili kay semana lang. Dili man gud pwede nga ikaw pod iyang ipokos labina panginahanglan man sab na ang trabaho. Kulang lang gyod mo og time management ug pagsinabtana.

Tita Heart