Masahista nga nawad-an og mga anak

PINAKASAKIT nga nasinati sa tibouk kinabuhi sa usa ka inahan nga masahista nga mao si Josephine Dacuno, 55, taga Balubal ning dakbayan sa Cagayan de Oro mao gayud ang pagkamatay sa iyang duha ka mga anak.

Gisaysay ni Josephine sa SunStar SuperBalita nga usa siya ka Overseas Filipino Worker kaniadto ug iyang gibilin ang iyang duha ka mga anak sa iyang kapikas sa kinabuhi.

Sa sinugdanan maayo pa ang ilang komunikasyon ug sakto sab iyang
pagpadal-anan og kwarta apan gibutyag niini nga niabot sa punto nga adunay laing babae ang iyang bana ug posibleng wala naatiman ang iyang 12-anyos nga anak nga lalaki niadtong tungora hinungdan nakabsan kini sa iyang kinabuhi sa sakit nga meningitis.

“Lapida nalang akong naabtan sa akong anak pag-uli nako diri sa Pilipinas,” matud ni Josephine kinsa duha ka tuig nga nanarbaho sa Saudi Arabia.

Dili sab matago ang pait nga malantaw sa mga mata niini samtang misaysay sa iyang kasinatian niining mantalaan.

Gumikan sab sa gihimo sa iyang kapikas nagkabulag sila ug gikuha niya sa
kamot niini ang iyang nahibilin nga usa ka anak.

Samtang nanarbaho na usab kini sa Dubai sa laing duha ka tuig ang iyang anak nga babae nga 22-anyos ang nakabsan na usab sa kinabuhi gumikan sa heart enlargement niadtong tuig 2007.

“Naa ko sa iyang kiliran sa iyang pagkamatay ug wala nay mas sakit pa sa akong gibati sa iyang pagkawala,” saysay niini.

Daw aron mawala ang kasakit nga iyang gibati gikan pa sa pagkawala sa iyang bana nga miuban og laing babae ug sa iyang duha ka mga anak nga mitaliwan, misuway na usab siya og panarbaho pag-usab gawas sa nasod ug didto na usab siya sa Hong Kong apan miuli sa nasod human sa usa ka tuig.

“Murag walay pulos ang akong pagpanarbaho didto kay kinsa man akong paningkamotan nga wala naman akong mga anak,” butyag niini.

Paghidangat niya dinhi sa dakbayan daw niagi pa siya og kabuang sa ilimnong makahubog ug sa barkada.

“Niagi pako og kabuang, nagbarkada para malimot sa tanan nga nahitabo sa
akong kinabuhi,” dugang niini apan daw bisan unsaon niya og lingaw sa iyang kaugalingon ang kasakit dili gayud mawala.

“Bisan pa diay unsaon nimo pagsige og inom, laag dili gyod nimo malimtan ang kasakit nga naa sa imong dughan,” butyag niini.

Nahatagan og paglaom

Gibutyag ni Josephine nga aduna siyay usa ka higala nga mihagit kaniya ug miaghat nga moeskwela sa pagka masahista.

Sa sinugdanan wala kayo niya gitagad ug nag-uban lamang sa pagpaenrol sa Technical Education and Skills Development Authority aron tun-an kini nga skills.

Daw dinhi siya nalingaw ug nahatagan og kaikag nga himoun kining panginabuhian.

Gawas niini mitungha na usab siya sa usa ka pribadong tunghaan nga nagtanyag gihapon unsa ang mga paagi sa pagmasahe.

Dinhi nahimoung miyembro si Josephine sa Lady of Fatima Therapeutic Clinic Center kinsa mga miyembro niini pulos mga lisensyado nga motanyag sab og masahe.

Atubangan sa Divisoria Police Station ug ilawom sa kanhi
Ampitheatre sa Divisoria ning dakbayan sa Cagayan de Oro kanunay nga makita si Josephine nga motanyag og masahe.

“Adlaw-adlaw gyod ko diri kay naa naman koy mga kostumer nga gatultol ug pamasahe dinhi,” butyag niini.

Gibutyag sab niini nga kung bibo ang masahe moabot sa unom ngadto pito ka mga kostumer iyang mamasahe matag-adlaw ug ang kita niini direkta ngadto kanila.

“Nanarbaho ko para sa akong kaugalingon nga molambo, panginahanglan sa
Panimalay, tubig ug kuryente,” matud niini.

Ang kantidad sa pagpamasahe sa whole body moabot sa P150 sulod sa 55 ka
minuto samtang P100 kon half body lamang ang ipamasahe.

Gibutyag usab ninii nga modawat sab siya og home service sa kantidad nga
P350 diin ang masahe moabot sa usa ka oras kapin.

Dugang niini nga ang iyang income magdepende sa mga kostumer nga bout
magpamasahe kaniya labina nga daghan sila sa area.

Gani dili tanang panahon daghan gyod ang gapamasahe ug niining bulan sa
Marso minos ang ilang kita gumikan kay padangaton ang pagsira sa klase.

Hinoun kon bakasyon magsugod na og dagsa ang mga kostumer nga gapamasahe
sa dapit.

Daw alang sa bout magpamasahe kaniya mahimo kining makontak sa cellphone number nga 09368431539 kon tinguha ninyo nga mag home service lamang kini.

“Ganahan nako ani nga trabaho kay nakatabang pako sa akong isig katawo nalimtan pa nako ang dili sayon nako nga kasinatian sa kinabuhi. Siguro kung naa man koy gibasolan mao kini ang kahigayonan, apan pagbout man kini sa labawng makagagahom,” panapos nga sulti niini sa SuperBalita.