Frias: Busog nga suroy paingon Surigao (unang parte)

Jaime A. Frias II

KUNG aduna ka’y suod nga higala nga moimbitar nimo og suroy dala sa iyang pick-up, ayaw na pagduha-duha!

Makatipid ka sa gasto ug masuroy nimo og ayo ang lugar ninyong adtoan labina kadtong wala pa sukad maadtoan nimo.

Gihangat ko sa akong suod nga higala nga si Niño Contreras, kinsa usa ka negosyanteng adunahan nga molaag ngadto sa duha ka probinsya sa Surigao.

Negosyo ang mismo niyang katuyoan ug nagpa-uban lang siya kanako kay tinuod nga laay kung mag-inusara mag-drive sa taas nga destinasyon. Ako, turista ang dating! Ahemz.

Niadtong paghangat niya, kas-a pa lang ako nakaadto apan diha lang mismo sa ubay-ubay nga lugar sa Surigao City ug wala kaayo ko nakalaag.

Apan sa paghangat ni Contreras, nisugot ko sa kataposan taliwala sa akong pagka-busy sa serbisyo sa barangay ug isip manunulat ning mantalaan.

Unya aha ka pa ana, libre sakay ug manganta pa mi sa mga kadalaing awit sa iyang play list sulod sa iyang pick-up. Apil sa iyang mga playlist ang mga Don Moen, standard jazz ni Frank Sinatra ug Michael Buble ug uban pa.

Ang naka-joker sa tanan mao ang iyang mga tinago nga mga soundtrack sa Walt Disney movies apil na ang bag-o gipasalida sa sinehan nga “Beauty and the Beast.” Niduyog sab ako sa pagkanta niana.

Kanta pa kami sa binabae nga soundtrack sa “Little Mermaid.” Mao na ang barkada!

Paingon Surigao gikan Cagayan de Oro, moagi kami sa dalan sa Lapasan paingon Butuan ug ubay-ubay nga dalan sa Agusan bag-o pa man moabot kami sa among destinasyon.

Mao ning nakapachada kon sakay ka sa pribadong sakayan. Makahunong ka sa gusto nimong hunongan labina nga unang nihunong kami diha sa Tagoloan nga adunay galaray nga namaligya og sweet corn.

Mga sweet corn nga galaray diha kasagara gikan sa Valencia, Bukidnon. Dagko kaayo ug pili kalang kung imong sweet corn butangan pa og cheese o simple lang sa kantidad nga P20 matag usa.

Naa sab ilang lami nga “binaki” nga gigama sa sweet corn mismo nga mokabat ngadto sa P20 paingon sa P25.

Gikan ana, sirit na sab kami kapin tulo ka oras paingon sa Butuan City diin nihunong kami kadyot aron mangape ug nanihapon daan bago pa man kami mopadayon sa usa na sab ka taas nga byahe.

Didto sa Butuan, nangaon kami sa inila nga restaurant nga ang Margie’s.
Nitilaw si Contreras sa ilang chili spice hotdogs nga nagkantidad duol sa P170 nga gigama sa lainglaing spices sama sa sibuyas, kamatis ug uban pa ug ang hotdog usa ka homemade sa maong establisamento.

Ang ako sab, gitilawan nako ang ilang Chicken in pandan with bagoong rice nga usa ka Thai food nga nagkantidad sa P195.

Ang manok gigama agi chicken curries ug naputos sa dahon sa pandan. Naay side dish sa kiliran sa plato nga adunay sisig, roasted peanuts, manga hilaw ug sibuyas.

Busog, as in!

(Subaya sa sunod Lunes ang sunod parti sa pag-abot nako sa akong destinasyon)