7 Oro baskeeters abante sa Jr. NBA Phils nat’l camp

Jaime A. Frias II

NAA sa pito ka Oro young basketeers ang nakasulod sa national finals atol sa gipahigayon nga Jr. NBA Philippines Regional Selection Camp Mindanao Leg bagohay lang sa Butuan City.

Tulo niana gikan sa Corpus Christi School nga sila Richard Carvero, Paolo Matthew Kho ug Aishe Mae Solis.

Naa sab sila Paolo Moreno sa Xavier University Grade School, Clyde Aaron Tagatungan sa St. Mary’s School, Pauleen Angelique Valle sa Misamis Oriental General Comprehensive High School, ug Mikyalla Taborada sa Kauswagan National High School.

Apan, dili kini pirmiro alang nila Moreno, Solis ug Valle kay mao kini ilang ikaduhang pag-adto sa national camp.

Mismo si Moreno nakadawat og “Rising Star of the Year” sa national camp niaging tuig dungan sa pagkuha ni Catrina Pong-Biongcog sa “Coach of the Year” award.

“Maayo ang ilang gipakita ug maayo nga ubay-ubay na ka Kagay-anon ang nakasulod sa national camp,” ingon ni Biongcog, kinsa nag-assist didto sa regional camp.

Gikalipay sab ni Catrina nga nakasulod sab ang iyang tinudloan nga si Taborada, kinsa nagpatudlo sa iyang basketball program niadtong Hunyo niaging tuig.

Kung unsa ang kalipay ni Catrina, dako sab ang ngisi ni St. Mary’s coach Rene Ilogon nga nakasulod si Tagatungan.

“He is promising and smart player. Dili kaayo ni siya maayo modula sa una, but he showed that he’s matured in the game and he’s ready to fly” ingon ni Ilogon bahin kang Tagatungan.

Dako sab nga katakos ang gipakita ni Kho human unang natawag sa vital’s test.

“Nagpakitang gilas gyud ang Kagay-nons didto and hope mao sab didto sa national camp,” ingon ni Catrina.