Dobleng daug sa City High

Jaime A. Frias II

NIBIRA ang Cagayan de Oro City National High School (CDONHS) o City High og kaluhang kampyonato paghuman sa 2nd CdeO Inter-Public School Basketball Tournament niadtong Domingo sa Nazareth Gym.

Kini, human gihawod sa City High teams ang under-17 ug under-15 nga kategoriya agi pagpilde sa ilang kadaiyang kaatbang sa finals.

Naangkon sa City High Tigers ang ilang ikaduhang sunod-sunod nga titulo agi pagpilde na sab sa Misamis Oriental General Comprehensive High School (MOGCHS) Cavaliers agi sa 83-63 nga kadaogan atol sa under-17 final.

Gikan sa hugot nga panagsangka sa first half, nibida ang most valuable player sa dula nga si Angelo Mercado alang sa Tigers.

Nagbangis si Mercado sa third quarter ug nagpa-ulan kini og tulo ka sunod-sunod nga tres aron dal-on ang Tigers sa komportableng labaw.

Naluag samot ang opensiba sa Tigers ug nakabinat sila sa ilang pinaka taas nga labaw nga 22 puntos paingon sa kadaogan.

Milanding ang MOGCHS sa ikaduha, samtang naa sa ika-tulo ug ika-upat ang Macasandig National High School ug Talakag National High School, sunod-sunod.

Sa pikas final, naangkon sab sa jr. Tigers ang under-15 nga kampyonato human giparot sab nila ang Carmen National High School Jr. Thunders, 74-65.

Bangis niabli ang Jr. Tigers og 18-5 run sa first quarter ug kontrolado nila ang dula agi pagdistansya og komportableng labaw.

Dili gakahutdan og atake ang Jr. Tigers ug wala nila tagae og tsansa ang Jr. Tigers nga moapas.

Naangkon lang sa jr. Thunders ang ikaduha nga pwesto, samtang ang MOGCHS Legends ug Macasandig NHS sa ika-tulo ug ika-upat.

Ginganlan sab ni tournament director Raul Fuentes ang mga mythical five, most improved player, most valuable player ug best coach sa duha ka division.

Sa under-17, nahimong mythical five sila Wilkens Vallente (Macasandig), Keanard Mapano (Talakag), Roniel Olarte (MOGCHS), Jesua Pabilona (City High) ug Paul Guidaben (City High).

Nanganlan sab si Mercado isip MVP sa kategoriya, samtang iyang ig-agaw nga si Carlo Mercado maoy most improved player. Si coach Bismark Labadan maoy nanganlan nga best coach.

Sa pikas division, sila John Rey Relevo (Macasandig), Justin Angelo Maputi (MOGCHS), John Stanley Jaraula (Carmen), Al Josua Arciallas (City High) ug Von Rosete (City High) mao ang mythical five sa under-15.

MVP sab si Mark Tagocon, samtang most improved player si Joel Colubia. Si Labadan sab ang nahimong best coach.