Assumption, Corpus na sa final karon

Jaime A. Frias II

GIPAGAWAS sa defending champions Assumption Montessori School (AMS) Jaguars aron latoson ang City High Tigers, 95-76, ug moabante sa final atol sa SM NBTC Cagayan de Oro Leg semifinal niadtong Biyernes sa Xavier University gym.

Nipupo si John Clarcton Piniero og 22 puntos aron mangulo sa Jaguars, samtang nihatag sab sila Joshua Mantalba ug John Lloyd Pagara og 12 ug 10, sunod-sunod.

Walay singaw sab ang mga tira ni Marc Leo Lim pagsugod sa dula nga adunay siyam ka puntos diin two-of-two siya sa three-point arc bag-o pa man siya gi-eject sa sa 2:43 minutos nabilin sa first quarter.

Bisan pa man nawala si Lim, dominado sa Jaguars ang dula ug nakainat sila og 19-0 run sa second quarter aron maangkon nila ang kinataas nga labaw nga 25 puntos, 50-25.

Medyo natubag kadyot sa Tigers ang ang ilang depensa agi pagpapasulod ni coach Bismark Labadan sa iyang twin towers nga sila Rolando Rafael Beltran ug James Reed.

Agi ana, naputol nila ang biya ngadto sa 10 puntos, 60-70, apan nagkakusog og samot ang Jaguars sa kataposang quarter.

Nabalik nila ang komportableng labaw ug nakuptan paingon sa kadaogan ug ang kataposang silya sa final aron maatbang ang Corpus Christi School Knights karong alas-8 sa gabie.

“We are looking forward sa among final kontra sa Corpus and we will be cautious about it,” ingon ni coach James Racines.

Nakaangkon og igong pahulay ang Knights ni coach Carlo Dagalea human gitagak nila ang Sacred Heart of Jesus Montessori School niadtong Huwebes sa gabie.

Dula karon:

8 p.m. -- Assumption vs Corpus