SPC wala tugta og grand slam sa XU

Jaime A. Frias II

WALA tugta sa Xavier University (XU) Crusaders nga maangkon sa Southern de Oro Philippines College (SPC) Sharks ang grand slam title.

Kini, human midaug sa lahotay ang Crusaders agi sa 106-100 kulbahinam nga daug batok sa Sharks aron angkonon ang titulo atol sa 2017 CDOBF Basketball Tournament college division final niadtong Sabado sa XU GYM.

Nagkalayo si Crusaders shooting guard Sean Tindoy og 24 puntos, samtang nimarka sab og dako ang center nga si John Rey Manatad og 15.

Sa sinugdanan pa lang, parehas bando nagbinalosa sa opensiba ug dikit ang panagsinukliay nila sa dula diin naabot pa sa 79-tanan pagtapos sa third quarter.

Gikinahanglan lang sa matag bando kinsa makakuha og igong buylo sa kataposan.

Ug sa ingnana, nipabor ang hangin ngadto sa Crusaders ni coach Rocky Calingin sa himatyanon nga minuto nabilin.

Gikan sa 100-99 hingpit nga labaw sa XU, nakakuha si Manatad og offensive rebound ug nadumala pa niya og iskor duol sa ring aron mabinat ang labaw sa tulo, 102-99, kapin 44 segundos nabilin.

Nisulay og tubag ang Sharks apan namugnaw ang ilang opensiba ug nahatag nila ang titulo ngadto sa Crusaders.

“The Sharks were very competitive and both of us showed a real championship match, where the changed hands,” ingon ni Calingin. “But, I have to give credit to my boys as they really have matured, worked hard and stayed focus.”

Nanimbarot pa ang mga kamot sa mga manan-away tungod sa nagkadikit nga panagsangka.

“Wala kami makasabot sa among gibati pagtan-aw. Mas mag-coach nalang mi kay sa motan-aw mi sa kulbahinam nga dula,” ingon ni XU Athletics Department staff Arvin Martinez sa iyang pagsaksi sa dula.

Dawat ni SPC coach Rey Dangcal ang kapildehan ug aminado nga niabot sa ‘breaks’ ang dagan sa dula.

“I learned where we lost our touches against XU, but I am moving on and focus to the next league in the Loyola Cup. But like I said, coach Rocky is a competitive coach,” ingon ni Dangcal.

Tungod sa kadaogan, morepresentar ang Crusaders sa Cagayan de Oro sa umaabot nga Philippine Collegiate League Mindanao Finals karong Nobyembre 21-25 sa Davao City.