Frias: Congrats, David Rey Ancheta!

Jaime A. Frias II

NAHIMONG bagong adisyon si David Rey Ancheta isip usa sa mga Kagay-anong nikampeyon sa Shell National Youth Active Chess Championships.

Kini, human gihawod ni Ancheta ang 14-under kiddies division sa ika-25 ug kataposang hugna sa SNYACC grandfinals niadtong Domingo sa SM Mall of Asia.

Solong naangkon ni Ancheta, kinsa ang alas nga chessplayer sa Corpus Christi School, agi pahuman og walo ka puntos sulod sa siyam ka rounds nga adunay pito ka daug ug duha ka tabla.

Labaw siya og usa ka punto sa nagsunod nga sila Mark Jay Bacojo ug Michael Concio Jr. nga parehas adunay pito ka puntos matag usa.

Nahimong ika-duhang Kagay-anong player si Ancheta nga nikampeyon sa kiddy division sa SNYCC grandfinal sunod kang Lennon Hart Salgados.

Lima na tanan na nga mga Kagay-anon ang nikampyon sa grandfinals sa ilang kadaiyang kapanahon.

Gawas nila Salgados ug Ancheta, nanghawod sab sila International Master Richelieu Salcedo, National Master Rustum Tolentino ug Bryan Jose sa juniors 20-below division.

Si Rhea Canino sab nahimong top lady player sa under-14 human siya ang kinataas nga pointer sa kababahian nga adunay upat ka puntos.

Alang kang David, congrats!

Tam-is ni nga kadaogan ni Ancheta labina mao ni ang kataposang tuig sa SNYACC.