Duplex kampeyon sa Ballpals 39-below

Jaime A. Frias II

GIPAROT sa Duplex ang FS Car Care, 87-84, aron angkonon ang 39-below title atol sa 2017 Baby James Cup Ballpals Inter-Color Basketball Tournament, diin nahuman tanan dula niadtong Sabado, Oktubre 7, sa Barangay 24 covered courts.

Nibida si Austin Rome Mutia sa kadaogan sa Duplex agi pagkulit og 19 puntos apil ang upat niya ka tres, samtang niabag sab sila Tarotoy Remoto ug Thirdy dela Cruz og 16 ug 10 puntos, sunod-sunod.

Nadiktar sa Duplex ang unang tulo ka quarters ug nainat pa nila ang ilang kinataas nga labaw sa 10 puntos, bago pa man nasirado ang third quarter sa 64-56.

Niposing og seryos nga hulga ang FS Car Care cagers human mipalumos si Roman Mutia, ang magulang ni Austin, og duha ka sunod-sunod ka tres aron putlon ang ilang biya ngadto sa upat nalang sa iskor 64-68.

Naangkon pa nila ang ilang unang tilaw sa labaw sa iskor 72-71 agi pagkumboya nila Mutia, Paolo Calingin ug Rolly Ampong pagbinat og 8-3 run.

Paspas nibangon ang Duplex human gibuga nila ang ilang kataposang inat agi pagsapar nila Austin, Remoto, Bobong Cabatuan ug Dela Cruz.
Nabyaan nila ang FS Car agi sa walo ka puntos nga biya, 84-76, nga adunay 42 segundos nabilin.

Nirally pa ang FS Car sa nabiling segundos apan kulang lang ang oras aron makaapas.

Nihuman sab ang magulang nga Mutia og 30 puntos alang sa FS Car, samtang nihatag si Jimboy Daanoy og 12 ka marka.

Congrats, David Rey Ancheta!