City High, MOGCHS kampyon sa 17, 15U inter-public

Jaime A. Frias II

GIHAWOD sa Cagayan de Oro National High School (NHS) ug sa Misamis Oriental General High School ang 17 ug under-15 boys division atol sa 2nd Cagayan de Oro Inter-Public School Basketball Challenge niadtong Domingo, Oktubre 8, sa West City Central School covered courts.

Nadepensahan sa City High Tigers ni coach Bismark Labadan ang under-17 title agi sa 107-67 nga paglata sa MOGCHS Cavaliers sa final.

Sa under-15, nakalingkawas ang MOGCHS Legends ni coach Ian Kim Lorenzana kontra sa Canitoan National High School agi sa 71-65 nga daug.

Nipupo og 28 puntos si Jerick Jan Ranido aron mangulo sa City High, samtang nihatag sila Jericho Hermoso, Angelo Mercado ug Mark Lein Jan Ranido og 17, 15 ug 13 ka marka, sunod-sunod.

Nabyaan ang Tigers og unom ka puntos nga biya kontra sa Cavaliers sa first quarter.

Apan, dali ra nakabangon ang Tigers aron ang angkonon ang quarter agi sa lima ka puntos nga labaw, 23-18.

Nagkagahi og samot ang Tigers pagtunob sa second quarter ug nabyaan nila ang Cavs og 28 puntos pagsirado sa first half, 57-29.

Gikan ana, kontrolado sa City High ang dula paingon sa titulo ug nainat pa nila ang ilang kinataas nga labaw nga 44 ka marka sa kataposang fourth quarter.

Usa nalang ka titulo og matala sa Tigers ang grandslam title sa kasaysayan sa liga, diin posibleng magpadayon ang ikatulong hugna karong Nobyembre.

Sa pikas bahin, nabuhat sa Legends ang wala nabuhat sa ilang pambato sa 17-under boys ug secondary girls.

Dikit ang panagsangka sa Legends ug Canitoan NHS Blazing Bricks ni coach Bienvenido Cubillan sa tanan quarters ug lahotay lang nagdaug sa kataposan.

Gikan sa 59-62 nga biya, nakit-an isip winning combination sila Cesar Charles Pagapulaan, Daniel James Palle ug James Lloyd Estoque alang sa Legends human mikumboya sila pagbinat og 12-3 run paingon sa kadaogan.

Tam-is ang nasinati ni Lorenzana tungod kay nasaulog niya ang unang titulo ning nga liga.

Nag-aso-aso sa opensiba si Marjun Jade Enriquez, kinsa nihuman og 30 puntos, sa tibook quarters apan wala siya makakita og kaabag sa pagsustinar sa ilang pagbuylo sa himatyanon nga minuto nabilin sa dula.