Valles nibida sa 6th win streak sa Gamba 97

Jaime A. Frias II

NAANGKON sa Gamba 97 ang ilang ika-unom nga sunod-sunod nga kadaogan agi sa 53-37 nga daug batok sa Batch 97 atol sa 8th XUHS-ABA Basketball Tournament niadtong Sabado, Septiyembre 9, sa XUHS covered courts, dakbayan sa Cagayan de Oro.

Wala ang presensya sa ilang star player nga si ex-San Miguel Beer forward Nelbert “Bitoy” Omolon, apan nibida si Niku Benson Valles sa ilang kadaogan.

Nipupo si Valles og 24 puntos, samtang niabag si Lap-lap Latosa og 10 marka.

Nadiktar tanan sa Gamba 97 ang tanan quarters ug wala nila tugta ang Alumni 2006 og tilaw sa labaw.

Hinay ang pagsugod sa 97ers sa unang half diin nahuman sa 19-16 nga labaw.

Didto gipagawas sa 97 ang ilang bangis sa third quarter agi pagbinat og 15 puntos nga labaw, 38-23.

Gisamotan pa pagtunob sa kataposang fourth quarter human milobo sa ilang kinataas nga labaw nga 22 puntos ug wala na maapsan sa 2006.

Taud-taud paghuman sa dula, mao pa ang pag-abot ni Omolon uban sa iyang pamilya.

“Actually, ang 2005 ra ang among tunok kay na-scout na namo nga kusog ug dili makumyansahan,” ingon ni Valles.

Niaging gabie, naangkon sa 97ers ang ilang ika-lima nga daug agi sa 71-67 kontra sa Jammers 05.

Sa ubang resulta niadtong Sabado, gitambak sa mas batan-ong 2004 ang Batch 1996 agi sa 72-31nga daug.

Gilat-an sab sa 2001 ang Spartans 91, 78-54, samtang giparot sa XUHS 94 ang IAM 98, 64-53.