MOGCHS martsa na sa semi round

Jaime A. Frias II

NIMARTSA na ang Misamis Oriental General Comprehensive High School (MOGCHS) Cavaliers sa semifinal round sa secondary boys division.

Kini, human makalingkawas ang MOGCHS agi sa 76-75 hingpit nga daug sa overtime batok sa Cugman National High School atol sa 2nd CDO Inter-Public School Basketball Tounament niadtong Domingo sa West City Central School covered courts.

Nibira si Cervin Caingin og 34 puntos aron mangulo sa kadaogan sa Cavaliers.

Duol maparot ang MOGCHS ni coach Jayson Cagmat sa himatyanon nga segundos nabilin diin labaw ang Cugman NHS Scorpions og duha ka puntos, 67-65.

Apan, naa si Alwin Dagpin nibayani sa tukmang segundos aron matabla ang iskor sa 67-tanan ug mapugos ngadto sa overtime.

Nabali ang sitwasyon sa extension human ang Scorpions ni coach Mark Jacutin maoy nabiyaan og duha ka puntos, 76-74, sa himatyanon nga segundos.

Nakakuha og foul si Richie Carnalna ug duha ka free throw diin naa sa iyang kamot ang pag-asa sa Scorpions magpabiling buhi sa dula.

Napasulod ni Carnalna ang usa, apan nigawas ang kataposang freethrow hinungdan nahatag nila sa Cavaliers ang kadaogan.

Sa under-15 boys, nihuman si Brad Cany og 20 puntos aron sakwaton ang Tablon junior Archers ngadto sa 58-49 nga kadaogan batok sa Indahag National High School baby skyhawks.

Sa secondary girls, giparot sa Bulua National High School lady claymasters ang Carmen National High School lady Thunders, 49-24.

Gipilde sa Pagatpat Elementary School Spartans ang South City Central School Southern Stars, 40-35, atol sa ilang panagsangka sa elementary boys division.