Iponan, Alzblas mag-abot na sab sa final

Jaime A. Frias II

MAG-ABOT na sab ang Iponan A ug Alzbals sa final human gipilde nila ang kadaiyang kaatbang sa semifinals atol sa 2017 Barangay Iponan Softball Fast Pitch Tournament niadtong Dominggo, Hulyo 16, sa Iponan open field.

Gitagak sa Iponan A ang Alubijid A agi sa 12-2 dominanteng kadaogan, samtang gitadyak sa Alzbals ang Iponan B agi sa 6-1 nga daug.

Nihuman nga walay tatsa ang Iponan A nga adunay 5-0 win-loss card human giharus nila ang kataposang duha ka tahas batok sa Alzbals ug Tagoloan.

Naa sa ikaduha nga pwesto ang Alzbals nga adunay upat ka daug ug us aka pilde.

Nagsunod ang sister team Iponan B nga naa sa ikatulo nga pwesto nga adunay 3-2 record, samtang ang Alubijid A naa sa ika-upat nga anaay 2-3.

Sa niagi, gipilde sa Iponan A ang Alzbals sa ilang panagbangi sa finals sa Alubijid Open.

“Rematch na sab ni. Magkabinal-anay sila karong Sabado,” ingon ni tournament manager Yeye Maagad.