Alcantara, Indian partner abante sa final

Jaime A. Frias II

NIMARTSA ang Kagay-anong si Francis Casey Alcantara ug iyang Indian partner nga si Karunuday Singh sa men’s doubles final atol sa US$25,000 F12 China Futures niadtong Huwebes, Hulyo 13, sa Shenzhen Tennis Centre, China.

Kini, human gipilde nila Alcantara ug Singh ang panagpares nila Chu-Huan Yi sa Chinese-Taipei ug Su Hao Zhong sa China sa semifinal.

Nag-abot sila sa hingpit nga panagsangka sa unang set diin nagtabla sila sa 6-tanan.

Apan, lahotay nagpaangkon nila Alcantara ug Singh pagsamad sa unang dugo aron angkonon ang unang set sa iskor 7-6 (3).

Wala na dayon nila gipalisod ang ilang kaugalingon human gisilyo nila ang ika-duha nga set agi sa 6-3 aron moabante sa final aron atbangon sila Nam Hoang Ly sa Vietnam ug Fajing Sun sa China.

Nisinati og kalisod sila Alcantara ug Singh sa quarterfinal kontra nila Yecong He sa China ug Wishaya Troncharoenchaikul sa Thailand diin nag-abot sila sa desisyon nga set.

Naunhan nila Alcantara ug Singh sila He ug Troncharoenchaikul agi sa 7-6 (3) sa unang set, apan nabaslan sila sunod agi sa 2-6 nga pilde.

Didto sa desisyon, gisirado nila Alcantara ug Singh ang dula agi sa 10-3 nga iskor.