Xavier high 94 masulay ang asido sa 2001

Jaime A. Frias II

MASULAY sa defending St. Francis Xavier Cup champions Xavier University High School (XUHS) 1994 ang asido sa Batch 2001 pag-agbat nila karon sa ika-tulong semana sa 8th XUHS-ABA Basketball Tournament karong Biyernes sa gabii, Hulyo 14, sa XU covered court, Pueblo de Oro.

Parehas ang Alumni 1994 ug 2001 nga walay tatsa sulod sa tulo ka sunod-sunod nga mga dula sukad sa pag-abli sa liga.

Apan, buot maduplikar sa Batch 1994 ang makasaysayang rekord ilang gibuhat niaging season isip ikaduhang bando nga niperpekto sa tanan nilang dulaan sulod sa 19 ka dulaan sa usa ka season apil ang finals.

Ang 1997 mao ang unang nibuak sa rekord nga walay tatsa paghuman sa usa ka season.

“1994 is still in tough shape and they got a good run from the start but 2001 is getting aggressive and a team to watch,” ingon ni Dhon Lazo, ang tournament commissioner.

Uban sa magsangka mao ang 1995 (2-0) batok sa 1991 (2-1) pag-abri sa mga dula karong Sabado gabii.

Maatbang sab sa Batch 1996 ni playmaker Elich Alfante ang IAM 98 ni chairman John Victor “Nanay” Ocampo, samtang magbangi ang 2007 kontra sa 2004.