Cavs mosulay og 2-0

Jaime A. Frias II

SULAYAN sa Cleveland Cavaliers nga utrohon na sab pagpilde ang Boston Celtics atubangan sa ilang dumadapig sa TD Garden pagdula nila sa Game 2 karon sa ilang National Basketball Association (NBA) western conference finals.

Posible nga gamiton na sab sa Cavaliers ang hugot nga depensa susama sa 117-104 nga kadaogan nila sa Game 1 kontra Celtics.

Niagi, nalimitahan sa Cavaliers si Isaiah Thomas diin nihuman lang og 17 puntos sa dula ug gamay kompirar sa mga pagpamuntos niya sa niaging playoffs.

Halos nakatotok kang Thomas ang depensa sa Cavs ug gilimitahan ang guard sa Celtics og dos puntos nga adunay unom ka minutos nabilin sa unang half.

Pangitaan og paagi sa Celtics pagpugong nila Lebron James ug Kevin Love, kinsa parehas nitala og dako alang sa Cavaliers.

Bangis nihuman si James nga anaay 38 puntos, siyam ka rebounds ug pito ka assists, samtang nihatag sab si Love og 32 puntos ug 12 rebounds.

Niabag sab si Tristan Thompson og 20 puntos ug siyam ka rebounds, samtang si Kyrie Irving nibira og 11 puntos ug unom ka assists.

Human sa Game 2, didto na sa balwarte sa Cavaliers ang Game 3 ug 4.