Spurs gilatos sa Game 2

Jaime A. Frias II

GIKAPITAL sa Golden State Warriors ang pagkaangol ni Kawhi Leonard aron latoson ang San Antonio Spurs agi sa 136-100 nga daug sa Game 2 atol sa National Basketball Association (NBA) western conference finals niadtong Miyerkules, Mayo 17, didto sa Oracle Arena.

Wala makadula ang kanhi NBA Finals most valuable player nga si Leonard pagangkon sa Warriors og 2-0 nga labaw sa ilang siryi.

Apil na si Tony Parker diin unang naangol sa nilabay nga playoffs ug gikataho nga dili na makadula.

Wala gipatilaw sa Warriors ang Spurs og labaw sugod pa sa unang quarter, diin nahuman sa 33-16.

Nalobo pa sa Warriors ang labaw ngadto sa 30 puntos bago pa man nasirado ang unang half.

Niabot pa sa kintaas nga labaw sa Warriors nga 39 puntos sa kataposang quarter.

Nihuman si Stephen Curry og 27 puntos ug tag-pito ka assists ug rebounds, samtang niabag si Patrick McCaw og 18 puntos.

Dako kaayo og storyahanan kung makabalik pa og dula si Leonard labina nga gikinahanglan iyang presensya pagdepensa sa ilang balwarte sa Game 3.

Sa iyang presensya sa Game 1, naglabaw ang Spurs og 25 puntos apan nabura pagkaangol niya.