Kulbahinam nga semis karon

Jaime A. Frias II

SULAYAN sa Romuls Power ug Rex Physical ang ilang mga asido pagsangka sa ilang kadaiyang kaatbang sa crossover round sa 2017 Green Cagayan de Oro Eagles karong Huwebes sa gabie, Mayo 18, didto sa Southern Philippines Colege covered court.

Masinati og kahayahay ang Romuls team ug Rex team tungod matagamtaman nila ang twice-to-beat advantage sa crossover.

Apan bisan sa maong pribilihiyo, tamukan sa Baba Pro Audio ug sa Oki Doki Dok ang mga hagit.

Ang Baba team ug Oki Dok team niagi og wild card nga mga dula aron angkonon ang kataposang duha ka silya sa crossover.

Maagbat sa Baba ang no. 1 Romul’s team, samtang dili lalim alang sa no.2 Rex team tungod maagbat nila ang nagpilde kanila sa elimination round nga ang Oki Dok.

Bantayonon ang Oki Dok kay mao lang ni nga bando sa elimination round nga nakasamad sa Romuls ug Rex.

Nihuman ang Romuls nga adunay pito ka daug ug usa ka pilde gikan sa kamot sa Oki Dok.

Ang Rex adunay unom ka daug ug duha ka pilde gikan sa Romuls ug ang Oki Dok.

Samot na karon nga nitunga na si Wawa Arocha isip dakong adisyon alang sa Oki Dok sa ilang opensiba nga mao sab nakatabang pagsakwat kanila pagsaka nila sa crossover round niaging semana.