Romuls Power pabiling nag-una

Jaime A. Frias II

GIKUPTAN gihapon sa Romuls Power ang solong liderato human gilatos nila ang mas tag-as nga Con-Air Alam na, 85-67, atol sa Green Cagayan de Oro Eagles 3rd President’s Cup niadtong Huwebes sa gabie sa Southern Philippines College covered court.

Mao ni ang ika-duhang sunod-sunod nga kadaogan sa Team Romuls gikan namantsa sa Oki Doki Doc niaging bulan.

“Tanan kami naglihok sa dula ug didto namo nademolis ang Con-Air sa pas-pas nga dula,” ingon ni SPO3 Ulysses “Romuls” Romulo, kinsa ang team captain sa Romuls Power diin aduna nay 7-1 win-loss record.

Mao sab ni ang ika-tulong sunod-sunod nga kapildehan sa Con-Air ug naa sila sa ika-lima nga pwesto nga anaay 2-6 record.

Hingpit nagsunod ang Rex Physical nga solong naa sa ika-duha nga pwesto nga adunay 6-2 card human gidemolis nila ang B1 Team Lingas, 90-73.

Gikan sa dikit nga dula sa unang half, nakakuha og buylo ang Rex nga modistansya sa sunod nga half ug nadumala pa nila nga mabinat ang ilang kinataas nga labaw nga 20 puntos.

Gikan ana, nakuptan sa Rex ang distansyang labaw paingon sa kadaogan.

Napugngan sa Baba Pro-Audio ang seryusong hulga sa Oki Doki Dok sa kataposang kwarter aron makalingkawas agi sa 85-76 nga kadaogan.

Gidiktar sa Baba ang unang kwarter agi sa iskor 22-15, apan nabali ang hangin sa ika-duha nga kwarter human mipaulan ang Oki Doc og mga tres.

Gidominar sa Oki Doc ang ikaduha nga kwarter agi sa mga pagpamomba og tres nila Larry Edrolin, Wilbern Neri ug Marvin Neri aron masirado ang unang half sa iskor 40-34.

Apan, gihinayhinayan sa Baba og kuyos ang mga hulga sa Oki Doc human mangulo si Michael Daigdigan sa opensiba. Nihuman si Daigdigan og 23 puntos, samtang niabag sila Allan Casiño ug

Taortoy Remoto nga parehas adunay 16 puntos.

Gikan nagtabla ang Baba ug Oki Dok sa ikatulo ug ikaupat nga pwesto niagi nga parehas adunay 4-3.

Apan, solo na nga naangkon ang ika-tulo nga pwesto nga adunay 5-3. Ang Oki Dok nadigyas sa ika-upat nga adunay 4-4.

Team

Romuls Power -- 7 wins, 1 loss
Rex Physical -- 6 wins, 2 losses
Baba Pro-Audio – 5 wins, 3 losses
Oki Doki Doc – 4 wins, 4 losses
Con-Air Alam Na 2-6
B1 Team Lingas 1-6