Cavs usa nalang ka daug

Jaime A. Frias II

USA nalang ka daug ug moabante na ang Cleveland Cavaliers sa ika-duha nga round sa NBA playoffs.

Kini human gihatdan sa Cavaliers ang ika-tulong sunod-sunod nga kapildehan sa Indiana Pacers, 119-114, atol sa ilang panagsangka sa Game 3 Biyernes, Abril 21, atubangan sa dumadapig sa Pacers sa Bankers Life Fieldhouse.

Nibida si Lebron James agi pagtala niya og triple-double nga anaay 41 puntos, 13 rebounds ug 12 assists.

Bangis nga nibangon ang Cavaliers gikan sa 20 puntos nga biya ug nadumala nila og putol sa pito ka puntos nalang pagsirado sa ika-tulo nga kwarter sa iskor 91-84.

Nadikit ang dula sa kataposang kwarter agi pagkomboya nila James, Channing Frye ug Kyle Korver.

Didto nagsugod og distansya ang Cavaliers human mipaulan sila Korver, James ug Frye og mga tres aron mabinat ang labaw sa pito ka puntos, 114-107, sa 54 segundos nabilin sa kataposang kanto.

Sa ubang Game 3 nga resulta, labaw og usa ka dula ang Milwaukee Bucks sa ilang siryi human gilatos nila ang Toronto Raptors, 104-77, atubangan sa dumadapig sa Bucks.

Nidaug sab ang Memphis Grizzlies sa ilang homecourt human gipilde nila ang San Antonio Spurs sa iskor 105-94.

Lamang gihapon Spurs sa ilang siryi nga anaa sa 2-1.