Mga bangiitang batang Mindanao magtipok

Jaime A. Frias II

MAGTIPOK ang mga bangiitang batang Mindanao sa umaabot nga Elite 60 Development regional camp for Mindanao karong Abril 28 hangtod 30 didto sa Xavier University covered court.

Kapin 64 nga piniling bangiitan gikan sa kadalaing eskwelahan sa Mindanao ang mopakita sa ilang katakos ug abilidad sa tulo ka adlaw nga basketball camp.

Gitunga ang maong numero sa duha ka grupo diin ang katunga o 32 ka mga batang basketbolista gikinahanglan natawo sa tuig 1999, samtang ang katunga pa niana natawo sa 2001.

Sulod sa training camp, pilion ang lima ka pinaka bangiitan nga basketbolista matag grupo ug moabante sa Elite 60 Development Camp didto sa Makati sunod bulan.

“Nagpadala kami og imbitasyon sa matag coaches sa kadalaing eskwelahan nga ipadala ang ilang nakita nga bangiitan,” ingon ni Arvin Martinez, kinsa ang coordinator sa Elite 60 Mindanao camp.

Nagpadala na si Martinez og mga imbitasyon dinhi sa Cagayan de Oro paingon sa Bukidnon, Butuan ug Iligan.

Dugang pa ni Martinez nga naa sab gitahasan nga moimbitar sa ubang pulo sa Mindanao nga mosalmot sa regional camp.

Tumong niini mao ang pagdiskobre og mga batan-ong bangiitan sa nasod ug lugar sab sa mga coaches gikan sa lokal nga molambo ilang coaching skills.

“This time we have a program that discovers the best of the best in the country,” ingon ni coach Eric Altimirano, ang kadakoan sa Elite 60 ug kanhi PBA coach.

Programa kini sa MVP (Manny V. Pangilinan) Sports Promotions.