Lakers gipukan sa Cavs

Jaime A. Frias II

NIBANGON ang Cleveland Cavaliers sa kataposang kwarter aron pildihon ang Los Angeles (LA) Lakers, 125-120, atol sa ilang NBA nga dula kagahapon didto sa Staples Center, home sa LA.

Nitala og 46 puntos, tulo ka assists ug duha ka rebounds si Kyrie Irving, samtang nipupo sab si Lebron James og 34 puntos, pito ka assists ug unom ka rebounds.

Nitala sab og double-double si Kevin Love og 21 puntos ug 15 rebounds sa kadaogan sa Cavaliers.

Gadiktar ang Lakers sa ika-duha nga kwarter ug nabinat pa sa 10 puntos nga labaw pagsirado sa ika-tulo, 92-82.

Apan, naapsan kini sa Cavaliers human mapasulod ni Irving ang duha niya ka free throws aron matabla ang iskor sa 106-tanan sa 4:32 minutos nabilin sa kataposang kwarter.

Gikan ana, nibinat ang Cavs og 11-2 run aron mabali ang hangin ug moangkon og komportable nga labaw sa iskor 117-108.

Nihulga pa ang Lakers nga modikit apan wala nila maapas tungod sa kagamay sa oras.

Pabiling nag-una ang Cavaliers sa eastern conference nga adunay 46-23 win-loss record, samtang ang Lakers naa sa kataposang pwesto sa western conference nga adunay 20-49.