GSW daug batok sa Bucks

Jaime A. Frias II

GIPUKAN sa Golden State Warriors (GSW) ang Milwaukee Bucks, 117-92, atol sa ilang NBA nga dula niadtong Dominggo, Marso 19, didto sa Oracle Arena, home sa GSW.

Nitala og 28 puntos og tag-upat ka assists ug rebounds si Stephen Curry, samtang niabag si Klay Thompson og 21 puntos ug tulo ka rebounds.

Naunhan sa Bucks ang Warriors sa unang kwarter diin nibinat sila sa ilang kinataas nga labaw nga 27-14.

Apan, hinay-hinay nga namugnaw ang Bucks human makabira ang Warriors og 13-2 run diin naputol ang labaw sa Milwaukee sa duha nalang sa iskor 29-27 pagsirado sa pirmirong kwarter.

Apan pagtunob sa ika-duhang kwarter, kalit lang nakulaps ang Bucks ug natugotan nila ang Warriors modiktar sa dula.

Nibinat og 19 puntos nga labaw ang GSW paghuman sa unang half sa iskor 63-44.

Gisamotan pa sa ilang kinataas nga labaw nga 27 puntos sa iskor 76-49 sa ika-tulong kwarter.

Nadumala pa sa GSW pagkupot sa ilang distansyang labaw ngadto sa kataposang kwarter paingon sa kadaogan.

Gibalik sa Warriors ang solong liderato sa western conference nga anaay 54-14 win-loss record. Hingpit nagsunod ang San Antonio Spurs nga anaay 52-16.

Nagsalo ang Spurs ug Warriors sa unang pwesto sa niagi apan, nibalik ang San Antonio sa ika-duha human masundan og duha ka sunod-sunod nga kapildehan.