Fernandez, Lozada niuli’g dungog

Jaime A. Frias II

NIULI og dungog ang Kagay-anong sila Ely Fernandez ug Alcer Lozada atol sa ilang kadalaing international tournament bago lang didto sa Bangkok, Thailand.

Parehas sila Fernandez ug Lozada nga niuli og silver medal matag usa sa ilang kampanya didto sa Thailand.

Silver lang ang nakuha sa 19-anyos nga Fernandez sa iyang unang international tournament sa 51 kilogram senior male category sa 4th Muay Boran World Championship, isip agi pagsaulog sab sa Second International Thai Martial Arts Games and Festival.

Niangkon sab og silver si Lozada sa 69.5 kilograms sa 14th World Muay Thai Championships sulod sa pagdumala sa World Muay Thai Federation.

“Silver is still a golden pride! Despite the odds, training hardships, and financial constraints, team Philippines still bagged a silver,” saysay ni Beh Barothy Hung, kinsa nagdumala sa duha sulod sa bando sa iyang gym nga ang Mindanao Ultimate Mixed Martial Arts.

Gipasalamat ni Hung ang mga sponsor sa ilang lakaw didto sa Thailand nga ang Filipino community sa New York nga gipangulohan ni Julia Caseñas. Naa sab sila Grace Jamias, Percilyn Moron, Alma Angana, ug Kristine Laurel.

Gipasalamat sab ang iyang pamilya ingon man sab sila coach Mario ug Victor de la Torre.

“Salamat sab sa Filipino Community dito sa Bangkok nga sila maam Iza and sir Kurt Garcia of Davao and Ms. Lanie and sir Ray Xu,” ingon ni Hung.