Spaghetti wires sugdan sa pagtangtang

Kris C. Sialana

SUGDAN karong Martes, Abril 17, ang pagtangtang sa mga wala nay gamit nga mga kable nga nagkutay sa mga poste human napirmahan ang memorandum of understanding (MOU) kagahapon, Abril 16.

Gibutyag ni chairman sa Kapisanan ng mga Broadcaster ng Pilipinas (KBP) Tito Monterde nga mga anaa sa 70 porsyento ang mga wala nay gamit nga nagbitay diha sa mga poste ang buot nila nga limpyohan ilabi na sa gimugnang Task Force Hapsay Kable.

“Actually, more than 70 percent of those based on statistics no, sa tagging wala nay gamit so ato nalang limpyohan aron mawala na ning mga mura og lukot. Lain kayo tan-awon, usahay gale ang mga motorista pag-magdrive naay nahulog nga mga wires abi nato makuryentehan ta pero actually, wala na’y mga gamit nga mga kable, mao na nga malimpyohan na tanan,” pahayag ni Monterde.

Naghangyo usab kini sa mga motorista ug katawhan nga unta makasabot gumikan kay aduna’y gamay nga apekto diha sa ilang dapit.

“Well, ang ato lang ipaabot nga hinaot makasabot ang atong motorista. Kaning mga nagparking sa along the streets hina-ot nga makasabot sila nga dunay gamay nga inconvenience pero alang man ni sa kaayohan sa tanan para sa tao sa Cagayan de Oro,” ang paghangyo niini.