Nanigbas og sakyanan, tiklo

Kris C. Sialana

NAGTINGKAGOL sa bilanggoan ang usa ka lalaki kinsa nanigbas og sakyanan diha sa Macanhan, Barangay Carmen, dakbayan sa Cagayan de Oro.

Gipanag-iyahan sa usa ka Richard Estañol, 39, minyo ug residente sa nahisgutang dapit, ang sakyanan nga Zusuki IPV nga nagdala sa numero sa YJM 137 human nga gitigbas ni Armando Janlan, 28, ulitawo ug residente sa susama nga dapit.

Sa nahipos nga impormasiyon, gikabutyag nga nagpakitabang si Estañol sa kapolisan human nga gitigbas ni Janlan ang maong sakyanan sa wala’y igong rason ginamit ang bolo samtang kini nakaparada lamang sa maong dapit.

Giingong misulay pa kini sa pagsibat sa dihang nakita ang presensiya sa kapolisan apan nadigyas kay lage lango man usab kini sa ilimnong makahubog hinungdan na usab sa pagkahagsa niini.

Nakaangkon og samad sa ulo ang maong suspek human nga nahapak ang ulo sa dihang natumba kini.

Narekober sa posisyon niini ang aduna’y gitas-on nga 14.5 pulgada nga bolo nga mao’y gigamit sa pagpanigbas sa maong sakyanan.

Dali usab kining gidala sa JR Borja hospital aron nga matambalan gyud dayon ang naangkong samad atol sa panghitabo.

Karong panahona kasamtangang nagtingkagol na kini sa Maharlika Detention Cell.