Trabahante sa CEED sapon nagsuyop

Kris C. Sialana

NASAPON sa kapulisan ang usa ka empleyado sa City Economic Enterprise Department (CEED) atol sa drug bust sa Purok 3, Barangay Puerto, dakbayan sa Cagayan de Oro.

Nasikop si Ronnie Nanay, 50, ulitawo ug residente sa Balubal, Upper Barangay Puerto ning siyudad ug gikonsiderang high-value target (HVT).

Samtang kauban niini sa pagkasikop ang usa ka beautician nga si Elton Paguidopon, 27, residente sa susama nga dapit lakip na ang target sa operasiyon nga si Jovelyn Romero, 23, adunay kaipon ug residente sa nahisgutang lugar.

Sa pakighinabi sa SunStar SuperBalita kang Romero, gipanghimakak niini ang alegasiyon tigpayuhot siya og ilegal nga druga.

Gitumbok niini nga sila si Paguidopon ug Nanay ang taodtaod na nga gagamit og ginadiling druga.

“Wala man ko napalitan, pagdakop nila sa ako wala man ko’y butang bale gisugo ra ko nila nga magpakuha, bale nadamay ra ko nila, bale sila ra’y gapanuyop ako dayon ilang, naapil ra ko, sugo-suguon ra ko hatagan ra ko’g P20, P30,” pahayag ni Romero.

Sa impormasiyon gikan sa kapulisan sa Police Station 2 (PS2) sa Cogon ubos ni Police Chief Inspector Harvey Abellanosa, nasayran nga P1,000 ang nasakmit nga druga diin gibana-banang anaa sa 0.30 gramo.

Samtang walay giluwatang pahayag si Nanay dihang gisulayan paghinabi sa Superbalita.

Sa pagsulat niini nga balita, ang mga dinakpan ang kasamtangang anaa sa mini-cell sa PS2 sa Cogon.