Popcom: Mga amahan dili lang taman sa palami

ADUNAY panawagan karon ang Commission on Population (Popcom)-Northern Mindanao ngadto sa mga amahan nga dako unta og papel sa maayo’ng panglawas sa ilang mga kapikas.

Gibutyag ni Popcom-Northern Mindanao Director Jeremias Gupit nga unta tabangan sa mga kalalakihan ang ilang asawa aron mapalig-on ilang pamilya ug maprotektahan sa unsa man nga motakboy nga sakit.

“Ang mga amahan unta maoy magpadumdom sa ilang mga asawa kon kanus-a ang eskyedul sa prenatal ug mga tsek-up ug dili lang kutob sa pagpaburos ug pasagdan na dayon ang ilang mga asawa,” matud ni Gupit nga magpahinumdum kanunay sa ilang mga asawa tungod kay sagad makahitabo tungod sa kadaghang buluhaton sa asawa malimtan na ang ilang mga kaugalingon nga panginahanglanon labina sa panglawas.

Dugang niini nga dako kaayo og tabang ang usa ka amahan nga mapalig-on ang ilang pamilya ug anaa kanunay nga makasuporta aron malamboun ang pagpuyo pinaagi sa pakigtambayayong sa pagplano sa pamilya.

Gani aduna silay gilusad nga programa nga gitawag og og KATROPA diin nagpasabot nga “Kalalakin-an Tiunay sa Responsiblidad ug Obligasyon sa Pamilya.”

Diin usa kini ka programa pag-aghat sa kalalakin-an nga motabang sa mga gimbuhatong pangbalay sama na lamang sa pagpanglaba, pagpanglimpyo ug uban pang buluhaton sa pangbalay nga dili lang nila tanan isalig sa ilang mga asawa tungod kay gikinahanglan usab kining trabahoun sa usa ka bana.