Nagtul-id og sakyanan naligsan, patay

NAKABSAN sa kinabuhi ang usa ka driver human naligsan sa naghaguros nga trak sa Barangay Poblacion, lungsod sa Tagoloan, Misamis Oriental.

Giila ang biktima nga si Rene Catagbo, 44, lumad nga taga Quezon, Bukidnon.

Sa inisyal nga report sa Tagoloan Police Station, nasuta nga kining biktima nadaotan ang gidrayban nga trak niadtong panahona tungod kay na-flat ang ligid.

Gikanaogan niini ug gitul-id daplin sa kalsada ug gipulihan sa ligid apan dihang pagawas niini ug pagtindog kalit kining naligsan sa naghaguros nga trak miresulta sa pagkalagpot niini.

Gisuwayan pa og dala ang biktima sa Northern Mindanao Medical Center, dakbayan sa Cagayan de Oro, apan pila ka minuto ang nilabay nakabsan sa iyang kinabuhi ang biktima.

Gisunod pa karon sa kapolisan kung kinsa ang responsableng nakabangga sa biktima.

Nasuta sab nga ngitngit niadtong tungora ug daw walay nakabutang nga early warning device.