Mga magpapili sa barangay eleksyon i-monitor sa PDEA

MASIBOG man o dili ang eleksyon sa barangay ug Sangguniang Kabataan gikan sa bulan sa Mayo ngadto sa Oktubre apan nagpadayon ang monitoring sa Philippine Drug Enforcement Agency (PDEA)-Northern Mindanao ngadto sa mga magpapiling opisyal sa gikatakdang piliay.

Gibutyag ni Department of Interior and Local Government (DILG)-Northern Mindanao Director Arnel Agabe nga gitahasan ang PDEA nga i-monitor ang mga magpapiling opisyal sa barangay lakip mismo ang mga barangay opisyal nga naghupot pa karon sa ilang katungdanan.

Kung adunay mga pangalan nga moabot kanila nga nalambigit sa mga ginadili nga kalihokan gikinahanglan pa kining ipaubos sa masusing balidasyon.

Nanawagan kini sa katawhan nga unta ang pilion nga mga kandidato kadtong mga adunay maayong record ug masaligan.

"Ang pipiliin natin yong mga kandidato na mattitino, mahuhusay at maasahan." matud ni Agabe sa mga tigbalita.

Walay sayop

Wala sab nakita nga sayop ang mga opisyal sa barangay nga silotan ang mga opisyal kon dili makasumiter og listahan o mga pangalan sa nalambigit sa ginadili nga druga sa ilang kabarangayan.

Gibutyag sa Presidente sa Liga ng mga Barangay sa Misamis Oriental Kapitan Leonard Winstanley nga wala kini sayop tungod kay alang man kini sa kalimpyo ug kalamboan sa mga barangay.

Ngani tanan nga mga kapitan ang gihangyo na nga magpaubos og drug testing aron sab masiguro limpyo ang ilang pagpanerbisyo sa kabarangayan.

Bisan ang presidente sa Liga ng mga Barangay ning siyudad sa Cagayan de Oro sa pagpangulo ni Kapitan Yan Lam Lim gibutyag niini nga gikinahanglan gyod sa usa ka opisyales ang limpyo ug walay daot nga record sa pagpanerbisyo.