Lalaki nag-check in, naglasong namatay

Kris C. Sialana

NAGMAOY ug kalit nga nisulirap ang mata sa usa ka lalaki samtang nag check-in Martes sa buntag sa usa sa mga motel sa Barangay Lapasan, dakbayan sa Cagayan de Oro.

Patay nahidangat sa tambalanan si Reynaldo (bansagon gitago), 47, minyo ug residente sa District 3, Consolacion.

Sa impormasiyon nga nahipos sa Northern Mindanao Medical Center (NMMC) ning dakbayan, gituohang gi-atake sa iyang gihambing nga balati-an ang lalaki.

Gikabutyag sa kapulisan sa Police Station 3 (PS3) sa Agora nga gitawag sa ilang buhatan ang panghitabo apan wala nila kini narespondehan dayon kay lage anaay natigayon usab nga kagubot sa ilang area niadtong panahona hinungdan nga gipapakalma lamang kini sa guwardiya.

Giingong gumikan kay wala na kini mikalma, gidala kini sa guwardiya sa PS3 apan lupaypay na kini sa dihang nahidangat sa ilang estasiyon mao nga nanawag kini sila og Oro Rescue.

“Nagsige naman pang-harass mao tong iyang gidakop, iyang gidala sa among opisina kay gi turn-over niya, gikarga niya sa sikad, pag abot didto sa among opisina didto silong naabot ang sikad pag-tan-aw namo lutay naman ang tawo lutaytay naman, wa na’y umoy ba,” pahayag ni Lim sa interbyu sa radyo.

Padayon pa ang imbestigasiyon sa kapolisan ang hinungdan sa kamatayon sa biktima ug gipa-ilalom sa otopsiya ang patay nga lawas aron nga masuta ang hinungdan sa tinuod niini nga kamatayon.

Gidugang pa nga sa inisyal nga imbestigasiyon wala usab kini sila’y nakitang mga samad ug bun-og gani nagtuo sila nga posibleng aduna ba kaha kini gi-inom nga nakapa-trigger sa gihambing nga sakit.

“Ipa undergo namo ang iyang patay’ng lawas og otopsiya kay para makita gyud nato kung unsa’y iyang cause of death kung naa bay foul play o wala, pero so far sa among tan-aw sa iyang lawas wala man sab mga bun-og, wala man sab samad," pahayag ni Lim.

“Posible siguro sa kuan lang huh, di man ta sigurado kay di man ta doctor basin og kaning kay daghan naman sad mahitabo nga susama niini nga kanang mosulod lage niining kaning mabugnaw nga kwarto nga dunay ikasangka, unya possible base nag-inom kaha og tambal unya under the influence of liquor so kuan kaayo ang iyang ginhawa, unya wala pa nako mahinabi ang asawa kung naa ba siya’y gihambing nga balati-an,” dugang pahayag niini.

Giingong una nga nag check-in ang lalaki apan mikanaog kini og nanghulam og charger sa front desk sa motel apan wala kini makahulam hinungdan nga nasuko ug naglasong.

Sa pagsulat niini nga balita, ang patay nga lawas ang kasamtangang anaa sa morgue sa NMMC ug gi-atiman na sa nahabiling pamilya.