Padayon Pilipino andam sa eleksyon

NAGTUO si Misamis Oriental Governor Yevgeny Vincente Emano nga adunay dako ug igong rason kon mahinayon man o dili ang Sangguniang Kabataan (SK) ug Barangay Election karong tuiga.

Kung aprobahan ni Presidente Rodrigo Duterte ang pag-oktaba niini posibleng lawom ang hinungdan.

"Kung aprobahan man kini ni Presidente Duterte nagtuo ko nga dunay igo nga rason nganong i-oktaba. Kung mahinayon man naa pod igong rason," matud ni Emano.

Butyag niini nga kung madayon man o dili andam kanunay ang ilang partido sa Padayon Pilipino sa gikatakdang piliay.

"Kung mahinayon man o dili kami sa partido Padayon Pilipino andam sa taliabot nga piliay," dugang pahayag niini ug miingon nga sa katapusan pagbout ug pagpili lamang gihapon sa katawhan ang matuman.

"At the end of the day, katawhan raman gihapon ang magbuot kinsa ilang gusto maghupot sa renda sa pangagamhanan sa ilang matag barangay," matud niini.

Ang founder ug kanhi Oro mayor ug kanhi Gobernador Dongkoy Emano nibutyag sab nga kung mahimo ipadayon ang eleksyon sa barangay ug SK.

"Kung mahimo, ipadayon lang ang piliay sa barangay. Kay katungod mana sa mga katawhan nga mopili sa ilang mga opisyal sa barangay human matapos ilang termino. Pero dili man ta kabout. Sila magbout sa taas ug maghulat na lang ta." Matud niini.

Gibutyag sab niini nga sa Cagayan de Oro kumpiyansa siyang daghan pa sa mga opisyales sa barangay ang anaa pa sa iyang partido.

"A large majority of barangay captains in Cagayan de Oro naa sa amo." Kumpiyansang pahayag sa amahan sa partido. (SVB)