Metropac, water district pact gitinguhang mapaundang

Kris C. Sialana

GIPATAWAG sa Philippine Competitive Commission (PCC) sa Malacañang ang pipila ka mga konsehal ning dakbayan sa Cagayan de Oro alang sa ilang giduso nga petisyon nga mapaundang ang joint venture agreement (JVA) sa Metropac ug Cagayan de Oro City Water District (COWD).

Tungod niini, nalipay sila Konsehal Reuben Daba, Eric Salcedo, Bong Lao, ug Atty. James Judith.

Sa pakighinabi kang Daba, gibutyag niini nga mo-atubang sila kauban ang JVA sa Metropac ug COWD diin kaayohan lamang sa katawhan sa dakbayan ang gitan-aw hinungdan sa pagsupak ug manghinaut sila nga makakuha og pabor.

“Ang among tumong ug tinguha nga atong ma-nullify ang JVA or Joint Venture Agreement sa duha kay nakita nato nga dehado kayo ang dakbayan sa Cagayan de Oro kung matuman na, so hinaot nga ampoan kami ninyo nga maayo, favorable unta atong response," pahayag ni Daba.

Gidugang pa nga kung dili mapahunong ang JVA bisan pa og unsa’y buhaton sa katawhan ug lokal nga panggamhanan dili na mapugngan ang pagtaas sa siingil niini.

“Kung mahitabo man gud kung padayon ang JVA ang mahitabo niana 70 porsiyento na dayon ang atong Metropac ang mahitabo dayon sa COWD 30 porsiyento nalang, so kung mo increase ang Metro pac walay mahimo ang COWD, ang atong local government bisan pag mag martsa-martsa kita, paligis kita diha sa dalan dili nato ma stop ang ilang pag increase,” dugang pa niini.

Nasayran nga nagduso og petition niadtong milabay nga bulan sa buhatan sa PCC ang maong mga opisyal aron nga mapaundang ang JVA.