Empliyado sa DSWD gipusil ang kaugalingong ulo

NAGPUSIL sa iyang ulo ang usa ka ulitawo nga empleyado sa gobyerno niadtong Lunes mga alas 2 sa hapon sa Terry Hills Subdivision, Barangay Bulua, dakbayan sa Cagayan de Oro.

Patay si Mark Leo Bantilan, 35, residente sa susama nga dapit kinsa trabahante sa Department of Social Welfare and Development (DSWD) ug usa ka Municipal Roving Monitoring sa Balingasag ug Sugbongcogon sa Misamis Oriental.

Sa impormasiyon nga nahipos, gikabutyag nga nidangop na lamang sa buhatan sa kapulisan ang si Leonardo, 66, amahan ni Bantilan kalabot sa giingong pagpakamatay sa anak niini.

Gikabutyag nga gamit ni Bantilan pagpusil sa iyang ulo ang armscor caliber 9mm nga giingong gipanag-iyahan sa amahan niini kinsa retiradong sundalo.

Wala pa usab masuta ang tinuod nga hinungdan sa pagpakamatay niini diin sutaon pa kung problema niini sa iyang trabaho o sa personal nga problema.

Sa pagsulat niini nga balita, kasamtangang giimbestigahan pa sa kapolisan ang tinuod nga hinungdan sa pagpakamatay niini.