Lalaki gipusil samtang nanglaag

MILANDIG sa tambalanan ang usa ka lalaki human kini gipusil sa wala pa mailhing suspetsado gahapon sa Barangay Puerto ning dakbayan sa Cagayan de Oro.

Giila ang biktima nga si Darren Canete, ulitawo, lumad nga taga lungsod sa Manolo Fortich, Bukidnon.

Sa inisyal nga imbestigasyon sa kapolisan sa Police Station 6 (PS6) sa Puerto, nasuta nga ang biktima naglaag kuyog ang mga higala niini sa dihang kalit nga gipusil ang biktima sa abaga ug paa niini.

Ang mga higala ni Canete nagtuo nga nadudahan lang kini sanglit ila man kining gihulagway nga buotan.

Kasamtangang giimbestigahan sa kapolisan ang motibo sa pagpusil kang Canete ingon man ang pagdakop sa suspetsado kinsa daling nakasibat human sa pagpamusil. (SVB)