Presyo sa bulak 'taga-liog'

Kris C. Sialana

GRABE ang pagsaka sa presyo sa bulak Miyerkules atol sa Valentine’s Day apan midagsa gihapon ang katawhan sa mga flower shop ilabi na atbang sa Cathedral Church sa dakbayan sa Cagayan de Oro.

Gibutyag ni Dondon Sevilla, 29, usa sa mga tighan-ay sa mga bulak nga grabe ang pagsaka sa presyo sa mga bulak apan daghan gihapon ang midagsa.

“Oo mahal na gayud kayo, ang usa ka dosena sa una P300 karon kay P800, ang tig P10 ra kay tig P75, daghan gihapon basta Valentine’s ug kanang Mother’s day," pahayag ni Sevilla.

Sa pakighinabi sa SunStar SuperBalita kang John Rubio, gibutyag niini nga buot niya nga hatagan ang asawa og bulak kay lage isip pagsaulog na usab sa espesyal nga adlaw sa mga kasingkasing.

Ang giingong Ecuadorian rose ang napili niini bisan paman nga medyo aduna kini mahal nga presyo kay lage unique man kini ug karon lang usab kini nakahigayon sa paghatag og bulak sa asawa.

“Para sa akong wife si Cindy, dalhon pa nako sa El Salvador, karon ra pud nakahigayon,” pahayag ni Rubio.

Ang Ecuadorian roses diin aduna’y unique nga kolor adunay kantidad nga P350 ang matag usa, usa ka dosena nga roses nagkantidad og P800, tulo ka chocolate nga aduna’y teddy bear nagkantidad og P1,000 ug uban pa.

Ang pinakabarato nagkantidad sa P75, aduna’y P400, P500, P5000 ug ang pinakamahal nagkantidad og P10,000 nga bouquet diin aduna na kini teddy bear, flowers ug chocolates.