MisOr alerto sa Bagyong ‘Basyang’

ALERTO na karon ang probinsya sa Misamis Oriental sa pag-landfall sa Bagyong Basyang diin lakip sa apektado ang Northern Mindanao.

Gibutyag ni Vicente Dy, head sa Provincial Disaster Risk Reduction Management Office, nga ila nang gipaubos sa yellow status ang probinsya samtang ilang buhaton ang red alert status.

Dugang ni Dy nga niadtong niaging semana pa niya gimando sa mga municipal team officer sa nagkadaiyang lungsod nga magbinantayon sa padulong nga bagyo diin nagdala kini og hulga sa pagbaha ug posibilidad sa landslide.
Andam na usab ang ekipo ug mga emergency vehicle nga motubag sa emerhensya nga maapektohan sa maong bagyo.

Mga lungsod nga gibantayan sa probinsya mao ang Talisayan, Salay, Lagonglong ug Balingasag nga kanunay makasinati sa pagbaha.

Ang Philippine Atmospheric Geophysical and Astronomical Services Administration (Pagasa) nagpasabot sa pagsulat ning balita Lunes, Pebrero 12, nga ang Bagyong Basyang nahimutang 72O kilometro gikan sa este nga bahin sa Hinatuan Surigao del Sur diin ubos na kini sa signal number 2.

Sa susamang adlaw, ubos na sa signal number 1 ang probinsya sa
Southern Leyte, Bohol, Cebu, Siquijor, Dinagat Islands, Surigao del Norte, Agusan del Norte, Agusan del Sur, Camiguin, Compostela Valley, Davao Oriental, Davao del Norte, Misamis Oriental, Misamis Occidental, Lanao del Norte, Lanao del Sur, ug Bukidnon diin laumang masinati ang kusog nga pag-ulan ug hangin.

Tungod kay signal no. 1 na ang halos tibuok probinsya ug rehiyon, wala nay kansta ug barko nga gitugotang mobiyahe ug lakip sa kanselado ang flight sa eroplano.

Ang pre schoolers usab ang awtomatikong wala nay klase kagahapong adlawa.