Gidaro sa sakyanan, 1 patay

Kris C. Sialana

PATAY ang usa ka babaye samtang kritikal ang usa ka lalaki human gidaro sa usa ka sakyanan samtang nagbaklay sa Velez-Gomez Street, dakbayan sa Cagayan de Oro Lunes sa kaadlawon.

Patay nahidangat sa tambalanan ang usa ka babaye kinsa wala pa maila sa pagsulat ning balita nga nagsul-ob og itom nga pants, maroon nga t-shirt nga aduna’y stripe sa may abagang bahin ug nagsul-ob og gold plated nga bracelet sa wala nga bukton.

Samtang ang laing biktima naila nga si Joseph Ampong, ulitawo ug residente sa Barangay 24 ning dakbayan.

Matod ni Police Chief Inspector Julius Clark Prisco Macariola IV, station commander sa Police Station 1 (PS1) sa Divisoria, nga samtang nagbaklay ang duha ka mga biktima sa nahisgutang dapit, gidaro kini sa Toyota Avanza Wagon nga adunay plate number nga ZMZ-374.

Ang suspetsado nailang si Ryan Dimakuta, 26, residente sa Alawi compound Port Area, Iligan City ug usa ka empleyado sa Mindanao State University (MSU-Main Campus).

Nasayran nga misulay pagsibat si Dimakuta apan nakabangga kini og laing sakyanan sa Neri–Capistrano Street hinungdan nga namatikdan ug gigukod sa kapulisan.

Nasikop ni Police Officer 2 Segundino Mariano ang suspek sa dalan sa Burgus sa maong dapit.

Gikatakdang pasakaan og kasong reckless imprudence resulting to homicide, serious physical injury, damage to property ug Violation sa Republic act 10586 or Anti-Drunk and Drugged Driving Act of 2013 ang suspetsado.

Samtang nanawagan ang kapulisan sa kabanay sa wala pa mailang biktima kung aduna kini membro sa pamilya nga babaye nga wala makauli nga mobisita sa morgue sa Northern Mindanao Medical Center aron masuta ug maila ang biktima.

Sa laing bahin, nanawagan si Macariola sa tanang motorista sa paglikay pagmaniho nga hubog aron likay sa disgrasya.