Tomboy gikulata ang kanhi uyab

Kris C. Sialana

BUN-OG ang naangkon sa usa ka dalaga human nga gisulong ug gipasakitan matud pa kini sa kanhi uyab nga tomboy mga alas 6:40 sa gabii niadtong Lunes, Nobyembre 13, sa Barangay 33, dakbayan sa Cagayan de Oro.

Nagpatala ang biktima nga si Princess (bansagon gitago), 20, dalaga ug residente sa Gaabucayan Street, Agora, Lapasan ning dakbayan batok sa kanhi uyab nga si Wilta Mae (bansagon gitago), 24 nga taga Macanhan, Carmen ug usa ka tomboy.

Sa impormasiyon nga nahipos gikan sa kapolisan sa Police Station 2 (PS2) sa Cogon, gikabutyag nga samtang anaa sa gitrabahoan nga patigayon ang biktima nga si Princess, kalit nga nitunga ang kanhi uyab nga si Wilta Mae ug gi kumpronta niini si Princess ug buot niini nga magkuyog sila.

Apan nagdumili si Princess hinungdan nga gipasakitan kini. Gidugang pa nga gikuha pa ni Wilta Mae ang iyang bag diin adunay salaping cash nga P300 ug mga personal nga mga gamit.

Posibleng wala matud pa makadawat kining tomboy sa nahitabo sa ilang relasiyon ilabi na sa ilang panagbulag hinungdan nga napungot kini ug nahimong pasakitan ang biktima kinsa gitambagan nga magkuha og medical certificate.

Sa pagsulat niini nga balita, ang insidente ang nakatala na sa buhatan sa kapolisan ug giduso sa Barangay Lupon alang sa tukmang disposasiyon.