Lalaki naghikog kay gibiyaan sa textmate

Kris C. Sialana

NAGPABILIN pa sa tambalanan ang usa ka lalaki human nga gibulagan sa kaipon niadtong Lunes, Nobyembre 13, sa Dansolihon, dakbayan sa Cagayan de Oro.

Ang biktima nailang si Reynard (bansagon gitago), ulitawo ug residente sa nahisgutang dapit apan lumad nga taga Cotabato City.

Sa impormasiyon nga nahipos, gikabutyag nga daling gidala sa Northern Mindanao Medical Center (NMMC) ning dakbayan ang biktima nga si Reynard human nga nabantayan nga nag-inom kini og hilo.

Giingong dili madawat niini nga gibulagan kini sa hinigugma kinsa gika-ipon sa pipila ka mga bulan. Gikabutyag nga textmate matud pa kini sila hinungdan nga nahidangat sa dakbayan si Reynard ug nakig-ipon sa babaye apan giingong gibulagan kini ug mikuyog sa laing lalaki hinungdan sa pagsulay sa biktima sa pagpakamatay.

Swerte na lamang nga dali kining nadala sa NMMC ug naatiman gayud dayon sa mga mananambal.

Samtang laing biktima ang naghikog niadtong milabay nga gabii kinsa wala’y swerteng patay na nga nahidangat sa NMMC.

Giingong naghikot sa li-og ang biktima nga naila lamang nga si Tawing, 37, minyo ug lumulupyo sa Purok 3, Barangay Gusa ning dakbayan.

Sa impormasiyon gikan sa kapolisan sa Agora, giingong nagkalalis ang biktima nga si Tawing ug ang iyang kaipon tungod sa ilang pamuyo diin wala matud pa’y trabaho ang biktima.

Giingong posibleng nahiubos kini ug kalit nga misulod sa lawak ug napalgan na lamang nga wala na’y kinabuhi human nga naghikot sa iyang li-og ginamit ang pisi sa duyan.

Karong panahona, ang managsama nga insidente ang nakatala na sa buhatan sa kapolisan.