Dunay deperensya sa panglawas gikulata

Kris C. Sialana

GIKULATA sa sikad driver ang usa ka aduna’y deperensiya sa panglawas tungod lang matud pa kay natukohan niini ang sikad niadtong Lunes sa gabii, NObyembre 13, sa Barangay 35, dakbayan sa Cagayan de Oro.

Nagpaalim pa ang biktima nga si Charlie Acain Jr., 33, ulitawo ug aduna’y deperensiya sa panglawas o usa ka person with disability (PWD) kinsa giingon nga maglisod sa paglakaw ug aduna’y brain tumour samtang ang suspek kinsa silingan ra naila nga si Michael Wasid, 27, ulitawo ug residente sa susama nga dapit.

Sa pakighinabi sa SunStar SuperBalita ngadto sa bayaw ni Acain nga wala’y kalooy matud pa niini nga gikulata si Acain bisan pa man nga natumba na kini ug bisan pa man nga aduna kini deperensiya sa panglawas.

“Trip lang niya, maglisod naman gud na og lakaw. Iyang nagunitan ang sikad ba dayon natuwang, nasuko siya iya dayon gikulata, hadlok siya magunitan iyang sikad” pahayag sa bayaw ni Acain.

Giingong bisan matud pa nga natumba na kining si Acain, gapadayon pa gihapon si Wasid sa pagsipa ug pagkulata niini. Gidugang pa nga karong panahona, naglisod kini sila pag-ayo gumikan kay mahal ang mga tambal niini.

Sa pagsulat niini nga balita, kasamtangan pa nga nagpaalim sa bun-og nga naangkon ang nahisgutang biktima.