Nangawat og taxi nabangga, sikop

Kris C. Sialana

GIINGONG nabangga ang taxi nga gisulayan pagkawat hinungdan sa pagkasikop sa suspek sa Calaanan, Canito-an, dakbayan sa Cagayan de Oro.

Nagtingkagol na si Birvel Almario, 23, ulitawo, taga Manggahan, Balulang ning dakbayan samtang ang taxi nga nagdala sa numero sa plaka nga KVX137 gimaneho ni Orson Perez, 47, minyo nga taga Crayola relocation, Calaanan.

Sa nahipos nga impormasiyon gikan sa kapulisan sa Police Station 7 (PS7) sa Bulua, gikabutyag di pa masuta kung unsa ang nabanggaan sa suspetsado samtang gimaneho niini ang taxi nga gisulayan sa pagkawat hinungdan nga naguba ang atubangan ug likod niini nga bahin.

Nasayran nga samtang giparada lamang ni Perez ang taxi kalit lang kining gi-ukoy sa suspetsado ug daling gimaneho apan wala’y swerteng nasapon kini.

Sa pagkakaron, nagtingkagol na sa Maharlika Detention Cell ang suspetsado alang sa pag-atubang sa tukmang kaso batok niini.