Pagkamatay sa naglasong gikasubo sa kapulisan

Kris C. Sialana

GIKASUBO sa kapulisan sa Cagayan de Oro City Police Office (Cocpo) ang kamatayon sa usa ka lalaki nga naglasong sa haya niadtong niaging adlaw sa Tulay Semento, St John, Puntod ning dakbayan.

Nasayran nga napusilan patay ni Police Officer 3 Argie Yecyec si Eric Dadang human kini naglasong ug nanion sa mga mitambong sa haya.

Si Police Chief Inspector Mardy Hortillosa, tigpamaba sa Cocpo, mibutyag sa ilang pagsubo kalabot sa hitabo ug niingon nga igo lamang nga ni depensa sa kaugalingon ang pulis.

Gikabutyag nga wala kini nahimo human nga wala mitahan ang armadong suspetsado ug nakigpinusilay hinuon.

Giingong gi-imbestigahan na usab kung aduna ba nalapas si Yecyec apan sa pagkakaron migawas nga giprotektahan lamang sa maong pulis ang iyang kaugalingon ug igo lamang nga midepensa.

Sa pagsulat niini nga balita, kasamtangan pa ang imbestigasiyon kalabot na sa insidente apan sa pagkakaron wala’y nakitang paglapas sa gihimo sa miyembro sa Cocpo.