MisOr guv nasakitan sa mga batikos

"Ngano magka-interes man ako nga matantang si Mayor (Moreno) sa katungdanan nga dili man namo kauban sa partido ang makapuli?” aminado si Misamis Oriental Governor Yevgeny Vincente Emano nga gakasakitan siya sa mga pagbatikos kaniya tungod lamang sa politika ug gakapasanginlan kung adunay mga kasong mogawas gikan sa buhatan sa Ombudsman batok kang Cagayan de Oro Mayor Oscar Moreno.

Niadtong Lunes, Oktubre 9, gibutyag sa gobernador nga daghan kaayo siya og nadungog nga mga pagbatikos batok kaniya apan dili kini niya isapayan tungod kay pagserbisyo ang iyang gilantaw sa kasamtangan.

Giingong ang pagpangatake nagsugod human daw gikabalaka sa kampo ni Mayor Oscar Moreno nga basin og modagan siya pagkamayor sa siyudad sa Cagayan de Oro sa tuig 2019.

"Ako sa pagka karon tutok sa kami sa turnover ug implementation sa mga projects. Ugma nata sa 2019, diba dili tamo sibugan. Debate ta diha sa inyo sa Gaston Park o sa parke sa kapitolyo. Asa nga barangay o Sitio ilang gusto,” matud sa gobernador.

Dugang ni Emano nga ang kampo ni Moreno labihan ang pangdaot sa iyang liderato ug daw kung adunay mogawas nga mga kaso ni Moreno siya maoy gapasanginlan kanunay.

“Paningkamot gyud sila. Matag hungaw sa ilang kaso, akoy pasanginlan. Klaro kaayo para lang dunay ilang makapakasala aron lantawon sila nga limpyo. Ilaha kining pagpangindahay ba basin mahaylo ug mailad ang mga tawo sa lalawigan ug dakbayan,” matud ni Emano.

Dugang ni Emano nga sa pagkakaron wala sa iyang plano ang pagpamolitika tungod kay layo pa kini kaayo ug labaw sa tanan aduna pa siyay nahibilin nga termini sa pagkagobernador.

Daw andam sab siya nga mohatag sa iyang kamot magtinabanga lamang mapalambo ang siyudad sa Cagayan de Oro ug Misamis Oriental.

“Trabaho lang sa ta. Dugay pa ang piliay. Mohangyo ko tinabanga sa kita. Bisan kapait sa ilang pagpanglait, pagpangdagmal ug pagpangdaut, itunol pa nako akong tuong kamot aron mag-usa kami sa pagserbisyo alang sa kalambuan sa lalawigan ug dakbayan,” matud sa Gobernador.

Kahinumduman gibatikos sa kampo ni Moreno si Emano sa usa ka programa sa konseho sa usa ka sibyaan sa radyo tungod kay daw walay nahimo sa iyang pagkagobernador ug lakip niini ang giingong walay pulos nga MisOr Cares nga programa niini.