Lalaki naglasong sa haya napatay sa pulis

Kris C. Sialana

NAGLASONG ug nani-on ang usa ka lalaki atol sa haya hinungdan nga napusilan kini sa pulis mga alas 6:10 sa gabii sa Tulay Semento, St. John, Puntod, dakbayan sa Cagayan de Oro.

Patay si Eric Dadang, 30, usa ka laborer ug residente sa Barangay Lapasan ning siyudad.

Samtang samaran ug nagpabilin pa ang bala sa bukton sa usa ka 11 anyos nga batang lalaki kinsa giingong na-igo sa saag nga bala atol sa pinusilay nga nahitabo.

Sa impormasiyon nga nahipos gikan sa Police Station 5 (PS5) sa Macabalan, nasayran nga kalit lang miabot sa dapit ang suspetsado.

Matud ni Irish Taculod, 29, anak sa gihaya, naglasong ug gipanghulga sa suspek ug nanion pa sa dala nga armas.

Gidugang pa nga gisulayan niini sa pagpusil ang 18 anyos niini nga pag-umangkon nga si Mark Sinugbuhan ginamit ang kalibre .38 nga revolver.

Atol sa panghitabo, dali usab nga mitaho sa Police Station 3 si Methoz Sheila Taculod, 22, samtang ang inahan nga si Delia Taculod, 62, ang daling nagpakitabang sa silingan nga pulis kinsa dali usab nga naka responde.

Subay pa sa mga biktima, kinsa anaa atol sa panghitabo ug nakasaksi, nakadungog kini sila nga gipatahan ni Police Office 3 Argie Yecyec ang suspetsado apan misukol kini og gipusil sa ikaduhang higayon ang pulis hinungdan sa pinusilay.

Nakadagan pa si Dadang una kini nahagsa.

Sa pakighinabi usab sa SunStar SuperBalita sa usa sa mga anak sa gihaya nga wala kini sila maka-ila sa maong lalaki.

Gibutyag sa Scene of the Crime Operatives (Soco)-Northern Mindanao sa pagpangulo ni Police Senior Inspector Christian Caballes nga nakaangkon si Dadang og ubay-ubay ka mga samad pinusilan diin usa niini sa dagway tulo sa atubangang bahin sa lawas, unom sa likod ug laing usa sa tangkugo.

Giingong dili pa masuta kung nakapabuto ang suspetsado gumikan kay kinahanglan pa kining ipa-ilalom sa eksaminasiyon.

“Hindi po natin masabi kung anong baril yung nakabaril sa kanya no kasi wala tayong nakuha na basiyo nang bala doon sa crime scene. Doon sa galing sa bumaril, ang nakuha natin is yung basiyo nang bala duon sa tabi nang namatay so hindi natin masabi kung nagpaputok yung namatay ano, nang baril ,kung siya ang nagpaputok nun nasa tabi nya po yung bala na mukha pong galling sa 9mm, tatlo,” pahayag ni Caballes sa interbyu.

Narekober sa crime scene ang kalibre .38 nga revolver (sub-nosed) nga adunay usa ka buhing bala, duha ka fired cartridges ug duha ka misfired ammunitions.

Sa pagsulat niini nga balita, ang patay nga lawas ang kasamtangang anaa na sa usa sa mga punerarya ning dakbayan.