Lalaki gitigbas sa landlord

Kris C. Sialana

NAKA-ANGKON og samad ang usa ka lalaki human gitigbas sa iyang landlord tungod sa bikil sa renta sa District 3, Barangay Consolacion, dakbayan sa Cagayan de Oro.

Nagpakitabang si Jericho Nash Delos Reyes, 32, adunay kaipon kinsa maoy nag-abang sa apartment sa nailang si Neil Linan ug landlord sa biktima human kini gitigbas.

Sa impormasiyon gikan sa Police Station 5 (PS5) sa Macabalan, gikabutyag nga nagkabingkil ang duha kalabot na sa renta sa balay nga kantidad og P5,500 nga advance deposit sa biktima.

Giingong buot nga kuhaon pagbalik ni Delos Reyes ang gibayad niini isip advance deposit kay lage mopahawa na kini sa girentahang apartment gumikan na usab kay wala na kini makauyon sa serbisyo.

Gikabutyag nga gikasuko kining Linan hangtod nga misangpot sa panaglalis ug miresulta sa pagpanigbas ug pagpangdunggab apan swerte na lamang nga gamay nga samad lang ang naangkon sa biktima.

Sa pagsulat niini nga balita, ang insidente ang nakatala na sa PS5 alang sa dugang pa nga imbestigasiyon.