Lalaki mibangga sa police mobile patrol, patay

PATAY ang usa ka lalaki human mibangga ang gimanehong motorsiklo niini sa police mobile patrol niaging gabii sa lungsod sa Balingoan, Misamis Oriental.

Giila ang biktima nga mao si Cedric Tolentino, hingkod and edad, ulitawo, taga lungsod sa Kinoguitan, Misamis Oriental.

Si Police Senior Inspector Danilo Popera, hepe sa Balingoan Police Station, nibutyag nga nagpatrolya ang iyang mga tao niadtong gabhiona kay gikan man nag-brownout ug bout niining adunay police visibility sa ilang area.

Sa pagbalik sa kuryente ang ilang driver sa patrol ang mi-backing aron moliko dihang hapit na miabot sa lungsod sa Kinoguitan tungod kay cleared man kaayo ang dalan niadtong tungora apan nakurat sila dihang kalit mibangga ang usa ka motorsiklo sa ilang hood sa patrol.

Tungod sa kusog nga impact milagpot ang driver niini nga walay sapot sa pangtaas ug naka-short pants lamang, walay gisul-ob nga helmet ug gitouhang lango sa ilimnong makahubog.

Wala sab kini mamatikdan tungod kay wala man lang headlight ang motorsiklo niini. Dead on the spot ang biktima dihang gigawasan sa mga polis nga sakay sa patrol.

Matud ni Popera nga wala siyay nadungog nga gibasol sa pamilya ang police patrol ug mga sakay niini nga polis ug gani wala pa nakabisita ang pamilya niini sa ilang buhatan ning panahona.

Gipaabot nila kini aron mahisgotan og insakto hilabina saksi man iyang mga sakop nga mga polis nga daw ang biktima maoy nibangga sa police patrol.

Hinoun aminado ang iyang pamilya nga nakurat sila nganong niabot sa Balingoan si Cedric tungod kay ang pananghid niini diha ra kini sa Kinoguitan mopaingon.

Sa pagkakaron gihaya na ang patay’ng lawas sa biktima sa ilang puloy-anan.