Lalaki gidunggab sa silingan

Kris C. Sialana

SAMAD sa kilid ang naangkon sa usa ka lalaki human kini gidunggab sa silingan diha sa may Block 3, Barangay Puntod, Cagayan de Oro.

Nilanding sa Northern Mindanao Medical Center (NMMC) ang biktima nga nailang si Efren Estallo, 33, minyo ug residente sa susama nga dapit samtang ang suspetsado nailang si “Jhong-jhong.”

Sa nahipos nga impormasiyon gikan sa NMMC diin gidala ang biktima gikabutyag nga nakurat na lamang kini sa dihang kalit nga miduol ang suspek ngadto na kaniya ug dayong duslak sa dalang mahait nga hinagiban.

Giingong nagpalit lamang og sigarilyo sa tindahan ang biktima apan kalit lang matud pa kining gidunggab sa maong suspek ginamit ang kutsilyo sa wala’y insaktong hinungdan.

Nakaangkon og samad sa kilid ang biktima hinungdan nga daling gidala sa balay tambalanan.

Sa pagsulat niini nga balita ang maong biktima ang pabilin pa nga nagpaalim.

Padayon pa usab ang kapolisan sa imbestigasiyon kalabot na sa maong insidenteng pagpangdunggab.